الجانب المظلم للمضادات الحيوية 💊💊
 
🤢🤧كتير ناس أول ما تحس بأعراض رشح أو إسهال بتروح عالصيدلية وبتطلب مضاد حيوي بالاسم، لأنهم بآمنوا انو الحل السحري لمرضهم، ومحقق المعجزات، وفي منهم بطلبوه بالشريط والحبة (هون أن بيجي عبالي أزغرد)، وللأسف هاي الممارسات الخاطئة بحق كيفية صرف وأخذ المضادات الحيوية ممكن تقلب السحر على الساحر على مدى السنين.
 
🤔عشان هيك قبل ما نحكي شو العواقب السيئة لأخذ المضادات الحيوية، لازم نفهم شو هو المضاد ومتى وكيف ممكن نستعمله
 
-المضادات الحيوية عبارة عن عيلة كبيرة بتشمل كتير أدوية اللي بتقتل أو بتمنع نمو البكتيريا (وركزوا انو بس البكتيريا).
➖➖➖
متى ممكن نستعمل المضاد الحيوي
👈🏻في العديد من الدول فارضة قوانين لصرف المضادات الحيوية، أي إنه لا يتم صرف المضاد إلا بوصفة طبية على عكس ما يحدث في الأردن، إذا بشد حاله شوي بصير يتقدم مع القهوة بجلسات العيلة.
 
💊لهيك الدليل الأول الأخير لتحديد مدى الحاجة لصرف المضاد الحيوي ونوع المضاد والجرعة الطبيب المختص بمساعدة الصيدلاني، لأنهم الأقدر على تحديد ما اذا كان المرض سبب بكتيريا أو فيروس أو فطريات أو طفيليات.
وفي الوضع المثالي يجب إجراء فحص زراعة بكتيريا بتم عن طريق أخذ عينة من المريض و الانتظار مدة تتراوح بين 3-5 أيام ، لظهور نتيجة الفحص اللي بتعطينا شو هو المضاد الحيوي الأنسب لحالة المريض.
 
🤔🤔كتير ناس راح تحكي لهون الأمور تمام بس شو فيها لو أخدنا المضاد الحيوي، إذا ما نفع ما راح يضر!
 
هاد الكلام وارد خاصة مع المضادات الآمنة واالي ما الها آثار جانبية تذكر، بس المشكلة راح تتفاقم على المدى البعيد ومع تكرار الاستعمال الخاطئ للمضاد الحيوي اللي بتمثل بالتالي:
• أخذ المضاد الحيوي بلا داعي زي لما ينصرف لعدوى فيروسية أو فطرية ( مثل أخذ المضاد عند الإصابة بالإنفلونزا اللي سببها بالأساس فيروس).
• أخذ المضاد الحيوي الغير مناسب للحالة ( لأنه كله مضاد مغطي أنواع معينة من البكتيرية فازا أخذنا مضاد غير مناسب ما بغطي البكتيريا الموجودة فمدة العلاج راح اطول و راح يعاني المريض من زيادة للمقاومة البكتيرية) و هاي الممارسة بتصير بمجتمعنا لما أبو حسن ينصح أبو فتحي بمضاد أخده قبل أسبوعين وجاوب معاه بسرعة .
• عدم أخذ كورس المضاد الحيوي كاملا وتركه عند الشعور بالتحسن فورا من أكبر الغلطات اللي بمارسها مجتمعنا.
• و أخيرا عدم أخذ الجرعة الصحيحة للمضاد الحيوي ومن هون الرقم الموجود على علبة المضاد الحيوي 500، 1000، 250، ان شا الله مليون لا يعبر عن التكرار اليومي للمضاد(مثلا مرة أو 3 مرات في اليوم) لأنه كل دوا إله خصائصه داخل الجسم .
 
⚛️كل هاي الممارسات بتأدي لظاهرة صحية خطيرة على المدى البعيد، المعروفة بزيادة مقاومة البكتيريا.
كيف🤔
🤤لما البكتيريا بجسمنا تتعرض لنفس المضاد الحيوي اللي المفروض إنه يقتلها أو يقلل من نموها، بتروح البكتيريا بتغير من حالها وبتقوي خطوط الدفاع اللي عندها، وبالتالي ببطل المضاد الحيوي الخفيف يقطع فيها وكل مرة بنصير نجتاج مضاد حيوي أقوى لبين ما يخلصوا الخيارات المتاحة أمامنا.☢️
 
☣️و شخصيا بتزكر كتير حالات مروا علينا بالمستشفى وحدة منهم بعد إجراء فحص الزراعة لتقرحات بالجلد، النتيجة كانت إنو كل المضادات و من بينها المضادات اللي بتنعطى عن طريق الوريد ولا واحد فيهم فعال و البكتيريا اللي عندها مقاومة للمضادات كلها، وبعد يومين اتوفت، و من هون بنحكي إنه الموضوع على المدى البعيد أبدا مش مزحة.
🤢و في أمريكا تم رصد حوالي مليونين حالة من العدوى البكتيرية المقاومة للمضادات الحيوية اللي أدت ل 230000 ألف حالة وفاة منهم!!!.
 
وفي عواقب تانية للاستعمال الكثر والخاطئ زي طول فترة العلاج والتعافي وكثرة اللجوء والبقاء في المستشفى و أمراض أثر خطورة و أخيرا زيادة تكلفة العلاج والصرف على الدواء بدون داعي.
📈📊و للأسف هاي الممارسات بتكون أسوأ ما يمكن لما أهالي يكون حريصين زيادة عن اللزوم على أطفالهم ويعطوهم عالطالعة والنازلة مضادات حيوية و بهيك تطور المقاومة البكتيرية بكون أبكر.
لهيك عزيزي المواطن الأردني إن كثرة استعمال المضاد الحيوي والاستعمال الخاطئ:
• لن يعالج العدوى.
• لن يقي من الإصابة بالعدوى.
• لن يساعد بشعور أفضل أو بتحسن العدوى.
• يمكن أن يؤدي إلى أعراض جانبية احنا بغنى عنهم من الأساس .
• يؤدي إلى زيادة المقاومة البكتيرية.
 
وأخيرا عزيزي المواطن الأردني سعر المضاد الحيوي غير مرتبط أبدا بفعاليته يعني مو كل ما كان أغلى معناتو هو فعال أكتر!
ولا تضغط على الطبيب إنه يكتبلك المضاد وتحس حالك إنه طلعت بجائزة كبرى، واللي بحكيلك إنه انت مو بحاجة لمضاد هاد اللي صدقه .
 
كتب المقال من Dana Al-Hassoun
-دانا الحسون دكتورة صيدلانية – الجامعة الاردنية ,أخصائية تغذية ومدربة رياضية معتمدة.
WhatsApp chat